ఆ వ్యాఖ్యలపై దీదీకి ఈసీ నోటీసులు.. 48 గంటల టైమ్

2 days ago 4

| Samayam Telugu | Updated: 08 Apr 2021, 08:26:00 AM

West Bengal Elections 2021 పశ్చిమ్ బెంగాల్ అసెంబ్లీ ఎన్నికల్లో బీజేపీ, టీఎంసీల మధ్య హోరాహోరీ పోరు నెలకుంది. మొత్తం 294 స్థానాలకు ఎనిమిది విడతల్లో పోలింగ్ జరుగుతోంది.

మమతా బెనర్జీ

ప్రధానాంశాలు:

  • బెంగాల్ అసెంబ్లీ ఎన్నికల్లో రసవత్తర పోరు.
  • ముస్లిం ఓటు బ్యాంకు విషయంలో దీదీ వ్యాఖ్యలు.
  • బీజేపీ ఫిర్యాదుతో నోటీసులు జారీచేసిన ఈసీ.
పశ్చిమ్ బెంగాల్‌ ముఖ్యమంత్రి మమతా బెనర్జీకి ఎన్నికల సంఘం బుధవారం నోటీసులు జారీచేసింది. ఎన్నికల ప్రచారంలో భాగంగా దీదీ చేసిన వ్యాఖ్యలపై 48గంటల్లోగా వివరణ ఇవ్వాలని కోరింది. మత ప్రాతిపదికన ఓట్లు అడిగినట్టు ఎన్నికల సంఘానికి ఫిర్యాదు రావడంతో దీనిపై 48గంటల్లోగా వివరణ ఇవ్వాలని మమతా బెనర్జీకి నోటీసులు ఇచ్చింది. బెంగాల్ అసెంబ్లీ ఎన్నికల ప్రచారంలో భాగంగా ఏప్రిల్‌ 3న హూగ్లీ జిల్లాలోని తారకేశ్వర్‌‌లో జరిగిన బహిరంగ సభలో మమతా బెనర్జీ పాల్గొన్నారు.

ఆ సమయంలో ఓ వర్గాన్ని ప్రస్తావించిన దీదీ.. కొన్ని పార్టీలు మైనారిటీ ఓటర్లను విభజించేందుకు ప్రయత్నిస్తున్నాయని విమర్శించారు. ఇలాంటి సమయంలో మైనారిటీ ఓటర్లందరూ ఏకం కావాలని మమత పిలుపునివ్వడం వివాదానికి దారితీసింది. దీనిపై కేంద్రమంత్రి ముక్తర్‌ అబ్బాస్‌ నఖ్వీ నేతృత్వంలోని బీజేపీ బృందం ఎన్నికల సంఘానికి ఫిర్యాదు చేసింది. దీనిపై స్పందించిన ఈసీ.. 48గంటల్లో వివరణ ఇవ్వాలని మమతా బెనర్జీకి నోటీసులు జారీచేసింది.

‘మైనార్టీ సోదరులు, సోదరీమణులకు చేతులు జోడించి అభ్యర్థిస్తున్నాను.. మైనార్టీ ఓటర్లను విభజించేందుకు దుష్టశక్తులు ప్రయత్నిస్తున్నాయి.. వాళ్లు బీజేపీ నుంచి డబ్బులు తీసుకుంటున్నారు.. హిందూ, ముస్లింల మధ్య ఘర్షణలకు దారితీసేలా మతపరమైన ప్రకటనలు చేస్తున్నారు.. సీపీఎం, బీఐపీలు బీజేపీ ఇచ్చిన డబ్బులతో మైనార్టీలను విభజించడానికి ప్రయత్నిస్తున్నాయి’ అని మమతా బెనర్జీ ఆరోపించారు.

ఈ వ్యాఖ్యలపై బీజేపీ ఫిర్యాదు చేయడంతో.. ఇవి ఆర్పీ చట్టం, ఎన్నికల నియమావళి ఉల్లంఘనగా పరిగణించి నోటీసులు జారీచేసింది. అయితే, బీజేపీ ఇచ్చిన ఫిర్యాదుపై తక్షణమే స్పందించిన ఈసీ.. తాము ఫిర్యాదు చేస్తే ఎందుకు పట్టించుకోవడం లేదని టీఎంసీ ప్రశ్నించింది. ఆ పార్టీ ఎంపీ మహౌ మెయిత్రా ట్విట్టర్‌లో మండిపడ్డారు. ‘బీజేపీ ఫిర్యాదులతో మమతాదీకి ఎన్నికల సంఘం నోటీసులు జారీచేసింది.. మరి టీఎంసీ ఫిర్యాదుల మాటేంటి.. కనీసం పక్షపాతం లేకుండా వ్యవహరించండి’ అని ట్వీట్ చేశారు.

ఏప్రిల్ 10న నాలుగో దశ ఎన్నికలు జరగనుండగా.. ఈ నియోజకవర్గాల్లో మోదీ ప్రచారం నిర్వహించారు. ఈ సందర్భంగా మమతా బెనర్జీ వ్యాఖ్యలపై ప్రధాని నరేంద్ర మోదీ విమర్శలు గుప్పించారు. ‘దీదీ ఇటీవల ముస్లింలంతా ఐక్యంగా ఉండాలని మీరు అన్నారు.. అంటే ముస్లిం ఓటు బ్యాంకు కూడా మీ చేజారిపోతుందని నమ్మకానికి వచ్చినట్టుంది.. ముస్లింలు మీ నుంచి దూరమవుతున్నారు’ అని ఎద్దేవా చేశారు.

బెంగాల్‌లో అసెంబ్లీ ఎన్నికల వేళ పలుచోట్ల ఉద్రిక్త పరిస్థితులు చోటుచేసుకుంటున్నాయి. పోలింగ్‌ సమయంలోనూ బీజేపీ, తృణమూల్‌ కార్యకర్తల మధ్య ఘర్షణలు జరిగాయి. తాజాగా బీజేపీ రాష్ట్ర అధ్యక్షుడు దిలీప్ ఘోష్‌ కాన్వాయ్‌పై కొందరు దుండగులు దాడికి పాల్పడ్డారు. ఈ ఘటనలో దిలీప్‌ ఘోష్‌ కారు అద్దాలు ధ్వంసమయ్యాయి.

Telugu News App: ఏపీ, తెలంగాణకు సంబంధించిన లేటెస్ట్ అప్‌డేట్స్‌, జాతీయ, అంతర్జాతీయ, ఎడ్యుకేషన్, బిజినెస్, సినిమా, ఆధ్యాత్మికం, స్పోర్ట్స్, వైరల్ కథనాల కోసం తెలుగు సమయం యాప్‌ను డౌన్‌లోడ్ చేసుకోండి.

తాజా వార్తల అప్డేట్ల కోసం Samayam Telugu ఫేస్‌బుక్ పేజీను లైక్ చెయ్యండి.

మరింత సమాచారం తెలుసుకోండి

Web Title : election commission issue notice to mamata banerjee for explain united muslim appeal
Telugu News from Samayam Telugu, TIL Network

Read Entire Article