కరోనా ఉధృతి.. సెకండ్ వేవ్ లక్షణాలు ఇవే

దేశవ్యాప్తంగా కరోనా కేసులు భారీగా నమోదు అవుతున్నాయి. ఇటు రాష్ట్రంలో కూాడా పాజిటివ్ కేసుల సంఖ్య రెండువేలు దాటింది. కరోనా కొత్త స్ట్రెయిన్ శరవేగంగా విస్తరిస్తోంది. అయితే కరోనా ఫస్ట్ వేవ్ లో వైరస్ లక్షణాలు తెలియడంతో... జనం కాస్త జాగ్రత్తగా ఉండేవారు. జలుబు, పొడి దగ్గు, కొద్దిగా జ్వరం, ఒళ్లు నొప్పులు, అలసట, శ్వాస సమస్య, వాసన, రుచి తెలియకుండా పోవడం వంటి లక్షణాలు ఫస్ట్ వేవ్‌లో ఉండేయి. కానీ ప్రస్తుతం విస్తరిస్తున్న సెకండ్ వేవ్ లో కరోనా లక్షణాలు భిన్నంగా ఉన్నాయని నిపుణులు చెబుతున్నారు. ఇప్పుడు సెకండ్‌ వేవ్‌లో కరోనా సోకిన వారిలో కొత్త లక్షణాలు కనిపిస్తున్నాయన్నారు. వైరస్‌ సోకిన వారిలో జీర్ణాశయ సమస్యలు, పొత్తి కడుపులో నొప్పి, కీళ్లనొప్పులు, కండరాల నొప్పులు, నీరసం, ఆకలి లేకపోవడం, వికారం, వాంతులు లక్షణాలు ఎక్కువగా కనిపిస్తున్నాయి. జీర్ణవ్యవస్థలో భారీగా ఉండే ఏసీఈ2 గ్రాహకాలకు అతుక్కుని వైరస్‌ తన ఉదృతిని పెంచుకుంటోందని నిపుణులు తెలిపారు.

ఈ లక్షణాలు ఉంటే టెస్టు చేయించుకోవాలని సూచిస్తున్నారు వైద్య నిపుణులు. ఈ లక్షణాలు కనిపించిన వారిలో జ్వరం, దగ్గు వంటి సమస్యలు లేకపోవడాన్ని నిపుణులు గమనించారు. అటు.. చాలామందిలో ఎలాంటి లక్షణాలు కనిపించకపోవడం ఆందోళన కలిగిస్తున్న అంశం. సెకండ్ వేవ్‌లో వైరస్ సోకిన వారికి లక్షణాలు కనిపించకపోవడంతో టెస్ట్ చేస్తేనే కొన్ని కేసులు బయటపడుతున్నాయి. దీంతో ప్రజలు సేకండ్ వేవ్‌తో ఆందోళన వ్యక్తంచేస్తున్నారు.