తెలంగాణపై కరోనా పంజా... వణుకుతున్న గ్రామాలు, స్వచ్ఛందంగా లాక్‌డౌన్

2 days ago 3

| Samayam Telugu | Updated: 08 Apr 2021, 04:00:00 PM

తెలంగాణ రాష్ట్రంలో కరోనా కేసులు పెరుగుతున్న నేపథ్యంలో అనేక గ్రామాలు స్వచ్ఛందంగా లాక్‌డౌన్ విధించుకుంటున్నాయి. నిబంధనలు ఉల్లంఘించిన వారికి భారీ జరిమానాలు విధిస్తున్నాయి.

Image

ప్రధానాంశాలు:

  • తెలంగాణలో కరోనా విలయతాండవం
  • స్వచ్ఛందంగా లాక్‌డౌన్ విధించుకుంటున్న గ్రామాలు
  • దుకాణాల తెరిచే సమయంపై ఆంక్షలు
తెలంగాణలో కరోనా మహమ్మారి విజృంభన కొనసాగుతోంది. బుధవారం ఒక్కరోజే 2వేలకు పైగా కేసులు నమోదు కావడం కలకలం రేపింది. నగరాలు, పట్టణాలతో పాటు గ్రామాల్లోనూ భారీగా కేసులు నమోదవుతుండటంతో ప్రజలు భయాందోళనకు గురవుతున్నారు. అయితే లాక్‌డౌన్ విధించబోమని స్పష్టం చేసిన ప్రభుత్వం.. కఠిన నిబంధనలు మాత్రం అమల్లోకి తెచ్చింది. అయితే రాష్ట్రంలోని కొన్ని గ్రామాలు మాత్రం తమకు తామే స్వచ్ఛందంగా లాక్‌డౌన్ విధించుకుని కరోనా కట్టడికి తగిన చర్యలు తీసుకుంటున్నాయి. దీంతో అనేక గ్రామాల్లో దుకాణ సముదాయాలు, మార్కెట్ కార్యాకలపాలు, ప్రయాణాలపై ఆంక్షలు విధిస్తున్నారు.

Also Read: ఆ టెస్టులు ఉంటేనే రాష్ట్రంలోకి ఎంట్రీ.. థియేటర్లపైనా ఆంక్షలు: తెలంగాణ హైకోర్టు

జగిత్యాల జిల్లా మల్లాపూర్ మండలం కొత్త ధాంరాజ్‌పల్లి, గొర్రెపల్లి గ్రామాల్లో లాక్‌డౌన్ విధిస్తూ పంచాయితీ పాలకవర్గాలు తీర్మానం చేశాయి. ఈ నెల 20 వరకు లాక్‌డౌన్ అమల్లో ఉంటుందని, దుకాణాలు ఉదయం 6 గంటల నుంచి 9గంటల వరకు, సాయంత్రం 4 నుంచి రాత్రి 9 గంటల వరకు మాత్రమే తెరిచి ఉంచాలని నిర్ణయించారు. నిబంధనలు ఉల్లంఘించిన వారికి రూ.వెయ్యి జరిమానా విధిస్తామని స్పష్టం చేశారు. ఇదే జిల్లాలో ఇప్పటికే సిరిపూర్, ఇబ్రహీంపట్నం గ్రామాల్లో లాక్‌డౌన్ కొనసాగుతోంది. మెట్‌పల్లి డివిజన్‌లోని నాలుగు గ్రామాలు స్వచ్ఛంద లాక్‌డౌన్‌ అమల్లోకి తెచ్చాయి.

Also Read: బేగంబజార్‌లో కరోనా పంజా.. 100కి పైగా పాజిటివ్ కేసులు, వ్యాపారుల షాకింగ్ నిర్ణయం

మహారాష్ట్రతో సరిహద్దు పంచుకుంటున్న ఆదిలాబాద్ జిల్లా బోథ్ మండలంలో భారీగా కరోనా కేసులు నమోదవుతున్నాయి. ఈ ఒక్క మండలంలోనే వారం రోజుల్లో 200కి పైగా కేసులు రావడంతో స్థానిక వ్యాపారులు కరోనా కట్టడికి చర్యలు తీసుకున్నారు. మండల కేంద్రంలో లాక్‌డౌన్ ప్రకటించడంతో పాటు మాస్క్, భౌతిక దూరం తప్పనిసరి చేశారు. కరీంనగర్ జిల్లా రాయికల్ మండలం కట్కాపూర్‌ గ్రామంలో 30 మందికిపైగా కరోనా బారినపడ్డారు. వీరంతా ఇతర ప్రాంతాలకు వెళ్లొచ్చిన తర్వాతే వైరస్ బారిన పడ్డారు. దీంతో గ్రామంలో ఈ నెల 21 వరకు లాక్‌డౌన్ విధించారు.

ఉమ్మడి నిజామాబాద్ జిల్లాలో ఒక్క రోజులోనే 94 కరోనా పాజిటివ్ కేసులు నమోదు కావడంతో ప్రజలు అప్రమత్తమవుతున్నాయిరు. మోపాల్‌ గ్రామంలో ఎనిమిది కేసులు రావడంతో స్వచ్ఛందంగా లాక్‌డౌన్ విధిస్తూ తీర్మానం చేశారు. దీన్ని ఉల్లంఘిస్తే రూ.500 నుంచి రూ.5వేల వరకు జరిమానా విధిస్తామని హెచ్చరించారు.

Telugu News App: ఏపీ, తెలంగాణకు సంబంధించిన లేటెస్ట్ అప్‌డేట్స్‌, జాతీయ, అంతర్జాతీయ, ఎడ్యుకేషన్, బిజినెస్, సినిమా, ఆధ్యాత్మికం, స్పోర్ట్స్, వైరల్ కథనాల కోసం తెలుగు సమయం యాప్‌ను డౌన్‌లోడ్ చేసుకోండి.

తాజా వార్తల అప్డేట్ల కోసం Samayam Telugu ఫేస్‌బుక్ పేజీను లైక్ చెయ్యండి.

మరింత సమాచారం తెలుసుకోండి

Web Title : more villages imposes self lockdown in telangana over corona effect
Telugu News from Samayam Telugu, TIL Network

Read Entire Article