ప.గో: పోలీస్ శాఖలో కరోనా కలకలం.. తమిళనాడు వెళ్లొచ్చిన తర్వాత

పశ్చిమగోదావరి జిల్లా పోలీస్‌శాఖలో కరోనా కలకలంరేగింది. తమిళనాడు ఎన్నికల విధులకు వెళ్లిన పోలీసు సిబ్బందిలో 10మందికి కరోనా సోకింది. 50 మంది పోలీసులు అంతా ఒకే బస్సులో ప్రయాణం చేశారు.. వారిలో ఆరుగురికి కరోనా పాజిటివ్ వచ్చింది. దీంతో మిగిలిన సిబ్బంది ఎన్నికల విధులకు హాజరవుతున్నారు. అలాగే పోలవరంలో ఎన్నికల విధులు నిర్వహిస్తున్న ఓ కానిస్టేబుల్‌కు కరోనా పాజిటివ్ వచ్చింది. ఇటీవల తమిళనాడు ఎన్నికలకు 367 మంది పోలీసులు వెళ్ళారు. కరోనా పాజిటివ్ వచ్చిన పోలీసులకు కాంటాక్ట్‌గా ఉన్నవాళ్లకు పరీక్షలు నిర్వహించేందుకు సిద్ధమయ్యారు.. వారిని క్వారంటైన్‌లో ఉంచారు.

మరోవైపు ఏపీలో కరోనా కేసుల సంఖ్య పెరుగుతోంది. బుధవారం విడుదల చేసిన బులిటెన్‌లో ఏకంగా 2331 కేసులు నమోదయ్యాయి. కృష్ణా జిల్లాలో అత్యధికంగా 368, విశాఖపట్నం జిల్లాలో 298, చిత్తూరు జిల్లాలో 296, అనంతపురం జిల్లాలో 202 కేసులు నమోదయ్యాయి. అత్యల్పంగా పశ్చిమగోదావరి జిల్లాలో 20 కేసులు వచ్చాయి. 11మంది ప్రాణాలు కోల్పోయారు.